केसर आंबा लागवडीतून मिळवा भरघोस नफा; योग्य तंत्रज्ञानाने उत्पादनात वाढ बातमी: चेतन लूतडे  वरोरा : शेतकऱ्यांसाठी केसर आंबा लागवड ही एक फायदेशीर पर्याय ठरत असून योग्य नियोजन व आधुनिक तंत्रज्ञानाचा वापर केल्यास भरघोस उत्पादनासोबत चांगला आर्थिक लाभ मिळू शकतो. केसर आंबा हा गोड, सुगंधी व बाजारात मोठ्या मागणीचा वाण असल्याने त्याला विशेष महत्त्व आहे. तज्ज्ञांच्या माहितीनुसार, केसर आंबा लागवडीसाठी गरम व कोरडे हवामान तसेच चांगल्या निचऱ्याची, सेंद्रिय कर्बयुक्त जमीन (pH 6.0 ते 7.5) योग्य मानली जाते. लागवडीपूर्वी १ मीटर x १ मीटर x १ मीटर आकाराचे खड्डे करून त्यात शेणखत, निंबोळी पेंड, सिंगल सुपर फॉस्फेट व ट्रायकोडर्मा मिसळणे आवश्यक आहे. लागवड साधारणतः जून-जुलै महिन्यात करावी. झाडांमधील अंतर १० x १० मीटर किंवा ८ x ८ मीटर ठेवावे. पाणी व्यवस्थापनासाठी ठिबक सिंचन सर्वाधिक उपयुक्त ठरते. पहिल्या वर्षी आठवड्यातून दोन वेळा पाणी देणे गरजेचे आहे. खत व्यवस्थापनात दरवर्षी प्रति झाड २०-२५ किलो शेणखत, १ किलो निंबोळी पेंड, तसेच यूरिया, सिंगल सुपर फॉस्फेट व म्युरिएट ऑफ पोटॅश यांचा समतोल वापर करावा. ...