भद्रावती : कर्नाटका एमटा येथील खुल्या कोळसा खाणीतील कामगारांना दिवाळी बोनस मिळाला नसल्याने गुरुवारी (१६ ऑक्टोबर) कामगारांनी मोठ्या संख्येने आंदोलन करून खाणीचे काम बंद पाडले. यामुळे बरांज खुली कोळसा खान पूर्णपणे ठप्प झाली असून परिसरात तणावाचे वातावरण निर्माण झाले आहे.
बी.एम.पी.एल. (BMPL) कंपनीकडून चालविण्यात येणाऱ्या या खाणीतील कामगारांना नियमानुसार वेतनाबरोबर वार्षिक दिवाळी बोनस देणे बंधनकारक आहे. कंपनीने १९ सप्टेंबर २०२५ रोजी बोनसबाबत ‘रिसर पत्र’ काढून कामगारांना लवकरच बोनस देण्याचे आश्वासन दिले होते. मात्र, दिवाळी अगदीच जवळ आली असतानाही कामगारांच्या खात्यात बोनस जमा झालेला नाही.
या पार्श्वभूमीवर उलगुलान खान कामगार संघटनेच्या वतीने आज संतप्त कामगारांनी अचानक खाणीचे संपूर्ण काम बंद केले. सकाळपासूनच कामगारांनी प्रवेशद्वारावर ‘बोनस द्या – नाहीतर खान बंद करा!’ अशा घोषणा देत घोषणाबाजी सुरू केली.
या घडामोडीची माहिती मिळताच कंपनी व्यवस्थापनाने भद्रावती पोलिसांना घटनास्थळी पाचारण केले. पोलिसांनी आंदोलन करणाऱ्या कामगारांना हटविण्याचा प्रयत्न केला, मात्र कामगारांनी ठाम भूमिका घेतली. अखेर कामगारांनी केपीसीएल (KPCL) कार्यालयाकडे मोर्चा वळवत भद्रावती येथील केपीसीएल कार्यालय समोर ठिय्या आंदोलन सुरू केले. या आंदोलनामुळे बरांज परिसरात वाहतूक काही काळ विस्कळीत झाली होती.
संघटनेचे नेते अरविंद देवगडे, पांडुरंग सातपुते, सुभाष गेडाम, विनोद आगलावे, महेश पेटकर, शंकर बाडपणे, मारुती खंडाळकर, रवींद्र निखाडे, महेंद्र नवघरे यांसह मोठ्या संख्येने कामगार उपस्थित होते.
******
Comments
Post a Comment