सायकलस्वार शेतकऱ्याचा अज्ञात वाहनाच्या धडकेत मृत्यू; चालक फरार

सायकलस्वार शेतकऱ्याचा अज्ञात वाहनाच्या धडकेत मृत्यू; चालक फरार

बातमी:

वरोरा : तालुक्यातील बोर्डा–जामगाव मार्गावर शिर नदीजवळ अज्ञात वाहनाच्या धडकेत सायकलस्वार शेतकऱ्याचा मृत्यू झाल्याची दुर्दैवी घटना ५ मे रोजी दुपारी घडली. या प्रकरणी अज्ञात वाहन चालकाविरुद्ध गुन्हा नोंद करण्याची प्रक्रिया सुरू आहे.

पोलीसांकडून मिळालेल्या माहितीनुसार, रामकृष्ण विठ्ठुजी जेनेकर (वय ५८), रा. दिंदोडा खुर्द (जामगाव) ता. वरोरा हे ५ मे रोजी सकाळी ११ वाजताच्या सुमारास आपल्या शेतातील आंबे सायकलवर घेऊन वरोरा येथे विक्रीसाठी गेले होते. आंब्यांची विक्री करून परत येत असताना दुपारी अंदाजे ४.०० ते ४.३५ वाजण्याच्या दरम्यान बोर्डा–जामगाव रोडवरील क्वॉलिटी बारसमोर, शिर नदीजवळ अज्ञात वाहनाने त्यांना जोरदार धडक दिली.

या अपघातात ते गंभीर जखमी झाले. स्थानिकांनी त्यांना तातडीने उपजिल्हा रुग्णालय, वरोरा येथे हलविले; मात्र उपचारापूर्वीच त्यांचा मृत्यू झाला. घटनेची माहिती मिळताच त्यांचे नातेवाईक रुग्णालयात दाखल झाले.

या प्रकरणी मृताचे चिरंजीव प्रशांत रामकृष्ण जेनेकर (वय २७) यांनी वरोरा पोलीस ठाण्यात तक्रार दिली असून अज्ञात वाहन चालकाने निष्काळजीपणे वाहन चालवून अपघात घडविल्याचा आरोप करण्यात आला आहे. पोलिसांकडून अज्ञात वाहनाचा शोध घेण्याचे काम सुरू असून पुढील तपास करण्यात येत आहे.