केसर आंबा लागवडीतून मिळवा भरघोस नफा; योग्य तंत्रज्ञानाने उत्पादनात वाढ

केसर आंबा लागवडीतून मिळवा भरघोस नफा; योग्य तंत्रज्ञानाने उत्पादनात वाढ

बातमी: चेतन लूतडे 

वरोरा : शेतकऱ्यांसाठी केसर आंबा लागवड ही एक फायदेशीर पर्याय ठरत असून योग्य नियोजन व आधुनिक तंत्रज्ञानाचा वापर केल्यास भरघोस उत्पादनासोबत चांगला आर्थिक लाभ मिळू शकतो. केसर आंबा हा गोड, सुगंधी व बाजारात मोठ्या मागणीचा वाण असल्याने त्याला विशेष महत्त्व आहे.

तज्ज्ञांच्या माहितीनुसार, केसर आंबा लागवडीसाठी गरम व कोरडे हवामान तसेच चांगल्या निचऱ्याची, सेंद्रिय कर्बयुक्त जमीन (pH 6.0 ते 7.5) योग्य मानली जाते. लागवडीपूर्वी १ मीटर x १ मीटर x १ मीटर आकाराचे खड्डे करून त्यात शेणखत, निंबोळी पेंड, सिंगल सुपर फॉस्फेट व ट्रायकोडर्मा मिसळणे आवश्यक आहे.

लागवड साधारणतः जून-जुलै महिन्यात करावी. झाडांमधील अंतर १० x १० मीटर किंवा ८ x ८ मीटर ठेवावे. पाणी व्यवस्थापनासाठी ठिबक सिंचन सर्वाधिक उपयुक्त ठरते. पहिल्या वर्षी आठवड्यातून दोन वेळा पाणी देणे गरजेचे आहे.

खत व्यवस्थापनात दरवर्षी प्रति झाड २०-२५ किलो शेणखत, १ किलो निंबोळी पेंड, तसेच यूरिया, सिंगल सुपर फॉस्फेट व म्युरिएट ऑफ पोटॅश यांचा समतोल वापर करावा. झाडाच्या सुरुवातीच्या वाढीच्या काळात छाटणी करून योग्य आकार देणे महत्त्वाचे आहे. तसेच मल्चिंग केल्यास जमिनीत ओलावा टिकून राहतो व तणांची वाढ कमी होते.

फळांची गुणवत्ता वाढविण्यासाठी फुलोऱ्याच्या काळात झाडावर ताण येऊ देऊ नये. फळगळ टाळण्यासाठी आवश्यक सूक्ष्म अन्नद्रव्यांचा वापर करावा. तसेच फळांना कागदी पिशवी लावल्यास त्यांची गुणवत्ता सुधारते. फळांची तोडणी एप्रिल ते जून दरम्यान करावी.

कीड व्यवस्थापनात धिप्पा, मिली बग, फळ माशी, खोडकिडे व पान खाणारी अळी या प्रमुख किडी आढळतात. यासाठी स्पायनोसॅड, फिप्रोनिल, इमिडाक्लोप्रिड यांसारख्या औषधांची शिफारस करण्यात येते. तसेच निंबोळी अर्काची नियमित फवारणी, पिवळे चिकट सापळे लावणे व स्वच्छता राखणे हे उपाय प्रभावी ठरतात.

योग्य नियोजन, नियमित देखभाल व कीड नियंत्रण केल्यास केसर आंबा लागवडीतून शेतकऱ्यांना मोठ्या प्रमाणात उत्पादन व चांगला नफा मिळू शकतो.