अवैधरित्या जनावरांची वाहतूक उघडकीस — ६३ जनावरे, ५८.२० लाखांचा मुद्देमाल जप्त; ५ आरोपी अटकेत

अवैधरित्या जनावरांची वाहतूक उघडकीस — ६३ जनावरे, ५८.२० लाखांचा मुद्देमाल जप्त; ५ आरोपी अटकेत

चंद्रपूर शहरात अवैधरित्या जनावरांची वाहतूक करणाऱ्या टोळीवर स्थानिक गुन्हे शाखेने मोठी कारवाई केली आहे. दोन ट्रक आणि एका पायलट वाहनासह ६३ जनावरे जप्त करण्यात आली असून एकूण ५८ लाख २० हजार रुपयांचा मुद्देमाल हस्तगत करण्यात आला आहे. या प्रकरणी ५ आरोपींना अटक करण्यात आली असून ११ जणांविरुद्ध रामनगर पोलीस ठाण्यात गुन्हा दाखल करण्यात आला आहे.

बातमी :

दिनांक ७ एप्रिल २०२६ रोजी पोलीस अधीक्षक, चंद्रपूर यांच्या आदेशान्वये स्थानिक गुन्हे शाखेचे पथक चंद्रपूर शहरात पेट्रोलिंग करीत असताना मुखबिरकडून मिळालेल्या माहितीच्या आधारे एम.ई.एल. माका, मुल रोड, चंद्रपूर येथे कारवाई करण्यात आली. या कारवाईदरम्यान दोन टाटा कंपनीच्या ट्रकमधून अवैधरित्या जनावरांची वाहतूक होत असल्याचे आढळून आले.

पोलिसांनी दोन्ही ट्रक ताब्यात घेत ६३ जनावरे जप्त केली. तसेच पायलटिंगसाठी वापरलेले चारचाकी वाहन आणि आरोपींचे ५ मोबाईल असा एकूण ५८,२०,००० रुपयांचा मुद्देमाल जप्त करण्यात आला.

या प्रकरणी ५ आरोपींना अटक करण्यात आली असून ११ आरोपींविरुद्ध रामनगर पोलीस ठाण्यात गुन्हा दाखल करण्यात आला आहे. जप्त करण्यात आलेली जनावरे सुरक्षेच्या दृष्टीने प्यार फाउंडेशन, छोटा नागपूर, जिल्हा चंद्रपूर येथे सुपूर्द करण्यात आली आहेत.

ही कारवाई पोलीस अधीक्षक श्री. मुम्मका सुदर्शन, अपर पोलीस अधीक्षक ईश्वर कातकडे यांच्या मार्गदर्शनाखाली पोलीस निरीक्षक अमोल काचोरे यांच्या नेतृत्वात स्थानिक गुन्हे शाखेच्या पथकाने केली.

सदर प्रकरणाचा पुढील तपास रामनगर पोलीस करीत आहेत.