गौमाता सन्मान दिवस” निमित्त वरोऱ्यात जनजागृती; तहसीलदारांना निवेदन सादर

“गौमाता सन्मान दिवस” निमित्त वरोऱ्यात जनजागृती; तहसीलदारांना निवेदन सादर

बातमी:28/4/26

वरोरा : “गौमाता सन्मान दिवस” निमित्त वरोरा शहरात विविध सामाजिक व धार्मिक संघटनांच्या वतीने गौमाता संरक्षण, सेवा व सन्मान यासाठी जनजागृती अभियान राबवण्यात आले. या उपक्रमाअंतर्गत कार्यकर्त्यांनी एकत्र येत वरोरा तहसील कार्यालयात जाऊन तहसीलदारांना निवेदन सादर केले.

या वेळी उपस्थित कार्यकर्त्यांनी गौमातेला भारतीय संस्कृतीत अत्यंत पूजनीय स्थान असल्याचे सांगत तिचे संरक्षण करणे ही प्रत्येक नागरिकाची जबाबदारी असल्याचे मत व्यक्त केले. तसेच शासनाने या विषयाकडे गांभीर्याने लक्ष देऊन ठोस पावले उचलावीत, अशी मागणी करण्यात आली.

निवेदनात राज्य व देशात गौहत्या बंदी अधिक कडक करणे, गोरक्षणासाठी कठोर कायदे व प्रभावी अंमलबजावणी करणे, गौमातेला “राष्ट्रमाता” दर्जा देण्याचा विचार करणे, भटक्या व निराधार गाईंसाठी निवारा व संगोपन केंद्रे वाढवणे तसेच शेतकऱ्यांना गाईंच्या संगोपनासाठी आर्थिक मदत व योजना उपलब्ध करून देणे, अशा विविध मागण्या करण्यात आल्या.

या प्रसंगी अनेक कार्यकर्ते व नागरिक मोठ्या संख्येने उपस्थित होते. सर्वांनी शांततेत व शिस्तीत आपली भूमिका मांडत प्रशासनाकडे निवेदन सादर केले. या उपक्रमामुळे परिसरात गौमाता संरक्षणाबाबत जागरूकता वाढण्यास मदत झाली.