खांबाडा येथे अवैध दारू विक्रीवर पोलिसांची धाड; 21 शिश्या जप्त, आरोपीवर गुन्हा दाखल

खांबाडा येथे अवैध दारू विक्रीवर पोलिसांची धाड; 21 शिश्या जप्त, आरोपीवर गुन्हा दाखल

बातमी: प्रतिनिधी

वरोरा : तालुक्यातील खांबाडा येथे अवैध दारू विक्री करत असलेल्या व्यक्तीवर वरोरा पोलिसांनी कारवाई करत गुन्हा नोंद केला आहे. ही कारवाई 26 एप्रिल रोजी सायंकाळी करण्यात आली.

पोलीस हवालदार विक्की सदाशिवराव करपे (ब. नं. 732) व पोलीस अंमलदार सतीश निखाडे (ब. नं. 1617) हे खांबाडा बिट परिसरात पेट्रोलिंग करत असताना त्यांना मुखबिरामार्फत माहिती मिळाली की, खांबाडा येथील प्रकाश विश्वनाथ सिडाम (वय 42) हा आपल्या घरासमोरील कॅनल पुलाजवळ अवैधरित्या दारू बाळगून विक्री करत आहे.

माहितीच्या आधारे पोलिसांनी पंचांसह घटनास्थळी धाड टाकली. तेथे संशयित इसमाकडे लाल रंगाची कापडी पिशवी आढळून आली. पंचासमक्ष तपासणी केली असता त्या पिशवीत 21 नग देशी दारूच्या सिलबंद शिश्या (प्रत्येकी 90 मि.ली.) आढळून आल्या. या शिश्यांची किंमत सुमारे 840 रुपये असल्याचे निष्पन्न झाले.

आरोपीकडे दारू बाळगण्याचा कोणताही परवाना नसल्याचे समोर आल्याने पोलिसांनी सदर दारू जप्त केली. तसेच नमुना शिशी सील करून तपासासाठी ठेवण्यात आली. पंचनामा सायंकाळी 6.35 ते 7.35 वाजेदरम्यान करण्यात आला.

या प्रकरणी प्रकाश विश्वनाथ सिडाम याच्याविरुद्ध महाराष्ट्र दारूबंदी कायद्यांतर्गत कलम 65 (ई) नुसार गुन्हा नोंद करण्यात आला असून पुढील तपास वरोरा पोलीस करत आहेत.

............