जुन्या वादातून तरुणावर लोखंडी रॉडने हल्ला; उपजिल्हा रुग्णालयात उपचार सुरू

जुन्या वादातून तरुणावर लोखंडी रॉडने हल्ला; उपजिल्हा रुग्णालयात उपचार सुरू

वरोरा, दि. 26 मार्च – येथील बोरी गावात जुन्या वादातून एका तरुणावर लोखंडी रॉडने हल्ला करून जखमी केल्याची घटना समोर आली आहे. जखमी तरुणावर उपजिल्हा रुग्णालयात उपचार सुरू असून पोलिसांनी याप्रकरणी गुन्हा दाखल केला आहे.

दिलेल्या माहितीनुसार, अक्षय  बोढे (वय २८, व्यवसाय ड्रायव्हर, रा. बोरी) हे २४ मार्च रोजी सायंकाळी सात वाजण्याच्या सुमारास आपल्या मित्र मोहन विकास बलकी याच्या मोटरसायकलवरून घरी जात होते. यावेळी गावातील मंगेश वाढई याने त्यांना थांबवून मोहन बलकीशी जुन्या वादावरून भांडण सुरू केले. अक्षय यांनी समजूत काढण्याचा प्रयत्न केला असता आरोपी मंगेश वाढई याने त्यांना शिवीगाळ करून शर्टच्या कॉलरने ओढत आपल्या घराच्या वॉलकंपाऊंडमध्ये नेले व लोखंडी रॉडने डोक्यावर वार करून त्यांना जखमी केले.

डोक्यातून रक्त सुटत असताना अक्षय हे बाहेर आले. तेथे आलेल्या त्यांच्या भावाने जगदीश बोढे यांनी त्यांना प्रथम माडेळी येथील सरकारी दवाखान्यात नेले, जिथून त्यांना उपजिल्हा रुग्णालय वरोरा येथे हलविण्यात आले. या प्रकरणी पोलिसांनी आरोपीविरुद्ध गुन्हा दाखल करून तपास सुरू केला आहे. जखमीची प्रकृती स्थिर असल्याची माहिती आहे.