वाघाचे दोन बछडे अंभोरा गावात दिसल्याने गर्दी, वनविभाग सतर्क

वाघाचे दोन बछडे अंभोरा गावात दिसल्याने गर्दी, वनविभाग सतर्क

अंकुश अवथे, चंद्रपूर 

चंद्रपूर: चंद्रपूर शहराजवळील महाऔष्णिक वीज केंद्राशेजारच्या अंभोरा गावात वाघाचे दोन बछडे सकाळी खेळताना दिसल्याने गावकऱ्यांमध्ये कुतुहल निर्माण झाले आहे. या घटनेमुळे गावात भीतीचेही वातावरण निर्माण झाले आहे.

गुरुवारी सकाळी कोवळ्या उन्हात ही दोन बछडे गावाच्या सीमेलगत खेळताना गावकऱ्यांना दिसली. लगेचच ही बातमी गावभर पसरली आणि बछडे पाहण्यासाठी गावकऱ्यांची गर्दी जमली. या बछड्यांची आई जवळच असल्याची शक्यता वनविभागाने व्यक्त केली आहे.

घटनेची माहिती मिळताच वनविभागाची टीम घटनास्थळी पोहोचली आहे. बछडे आणि गावकऱ्यांमध्ये सुरक्षित अंतर राखण्यासाठी वनविभागाचे कर्मचारी प्रयत्न करीत आहेत. त्यांनी गावकऱ्यांना सावधगिरी बाळगून बछड्यांच्या जवळ जाऊ नये आणि गोंधळ न करता याची माहिती वनविभागाला देण्याचे आवाहन केले आहे.

या परिसरात वन्यप्राणी, विशेषत: वाघ, कधीकधी दिसत असल्याचे नोंदवले जाते. वनविभागाकडून पुढील मार्गदर्शनाची प्रतीक्षा आहे. सध्या बछडे सुरक्षित आहेत अशी माहिती वनविभागाने दिली आहे.