वरोरा येथे पुलाच्या कामासाठी खड्डा उघडा ठेवल्याने दुचाकीस्वार गंभीर जखमी; विभाग व कंत्राटदारावर कारवाईची मागणी

वरोरा येथे पुलाच्या कामासाठी खड्डा उघडा ठेवल्याने दुचाकीस्वार गंभीर जखमी;  विभाग व कंत्राटदारावर कारवाईची मागणी

वरोरा, (२७/३/२६): सार्वजनिक बांधकाम विभाग व संबंधित कंत्राटदार कंपनीच्या निष्काळजीपणामुळे झालेल्या अपघातात दोघे तरुण गंभीर जखमी झाल्याची घटना समोर आली आहे. बोर्ड ते पावना या मार्गावरील पुलाच्या बांधकामासाठी रस्त्यावर उघडा ठेवलेल्या मोठ्या खड्ड्यात दुचाकी पडल्याने हा अपघात झाला. जखमी तरुणांवर नागपूर येथे शस्त्रक्रिया करण्यात आली असून, एकाच्या डोक्याचे ऑपरेशन बाकी असल्याचे सांगण्यात येत आहे.

आकाश येकांजी बारसागडे (वय २९, रा. कॉलरी वॉर्ड, वरोरा) यांनी दिलेल्या तक्रारीनुसार, दिनांक १० जानेवारी २०२६ रोजी सायंकाळी सहा ते सात वाजताच्या सुमारास ते त्यांचे मित्र अंकित गजानन करडभूजे (वय २७) व गोपाल पुरुषोत्तम विरुटकर हे तिघे दुचाकी (क्र. एम.एच. ३४ बीएक्स ४४९४) ने आगरा येथून परत येत होते. अंधार असताना पुलाच्या कामाजवळ कोणतेही दिशादर्शक फलक, रिफ्लेक्टर किंवा सुरक्षा बंधारे नव्हते. फक्त पांढरी पट्टी होती, मात्र तीही व्यवस्थित दिसत नव्हती. त्यामुळे पुढे मोठा खड्डा असल्याचे लक्षात येण्याआधीच दुचाकी खड्ड्यात कोसळली.

या अपघातात आकाश बारसागडे व अंकित करडभूजे हे गंभीर जखमी झाले. दोघांनाही प्रथम जिल्हा रुग्णालय, चंद्रपूर येथे हलविण्यात आले व नंतर पुढील उपचारासाठी नागपूर येथे हलविण्यात आले. आकाश यांच्या दोन्ही हातांची शस्त्रक्रिया तसेच चेहऱ्यावर टाके लावण्यात आले असून, अंकित करडभूजे यांचा हाताची शस्त्रक्रिया झाली असून डोक्याचे ऑपरेशन बाकी असल्याचे डॉक्टरांनी सांगितले आहे.

अपघातानंतर सार्वजनिक बांधकाम विभाग व कंत्राटदार कंपनीकडून कोणतीही मदत न करण्यात आल्याचा आरोप तक्रारीत करण्यात आला आहे. घटनास्थळी रक्तबंबाळ अवस्थेत पडून असताना ग्रामस्थांनी धावून त्यांना रुग्णालयात दाखल केले.

आकाश बारसागडे यांनी या प्रकरणी संबंधित विभाग व कंत्राटदार कंपनीविरुद्ध एफ.आय.आर. नोंदवून कठोर कारवाई करण्याची, तसेच झालेल्या शारीरिक, मानसिक व आर्थिक नुकसानीबद्दल नुकसानभरपाई व वैद्यकीय उपचारासाठी आर्थिक मदत मिळवून देण्याची मागणी केली आहे.